Alþjóðahús spyr um útlendingsleika

„Ég vildi kalla eftir skilgreiningu frá lögreglunni, um hvað hún eigi við. Hvort „útlendingslegur“ eigi við um ljóshærða og bláeyga sænska stráka eða dökkhærða og brúna – það gæti átt við um Austfirðinga, til dæmis,“ segir Katla Þorsteinsdóttir, stjórnarformaður Alþjóðahúss. Hún vísar hér til eftirlýsingar lögreglunnar á höfuðborgarsvæðinu síðan á þriðjudag, en þar var lýst eftir þremur þjófum um þrítugt. Þeir voru sagðir útlendingslegir á að líta. Katla segist almennt séð á móti því að fólk sé skilgreint svona. „En ég get ekki séð að þetta sé móðgun við útlendinga, mér finnst nú stundum vera sagt til hróss að einhver sé útlendingslegur. Ég veit bara ekki hvað þeir eiga við, það er til fullt af myndarlegu fólki á Íslandi,“ segir hún. Stefán Eiríksson lögreglustjóri segir að orðalagið hafi vakið upp spurningar. Lögreglan hafi ekki nein viðmið um útlendingslegheit. „Ég held að þetta sé nú bara óheppilegt orðalag, sem þarna hafi farið út frá okkur, ekkert öðruvísi en það. Lögreglan vildi koma að þeim upplýsingum, að menn töldu að þarna væru á ferðinni menn af erlendum uppruna. Það byggist nú ekki bara á útliti þeirra,“ segir hann. Slíkar upplýsingar geti hjálpað til við að koma fólki og lögreglu á sporið. - kóþ