Lægstu og hæstu tekjur lækka

Þeir sem voru með undir tvöhundruð þúsund krónum í laun í maí í fyrra, eru nú að meðaltali með „verulega minni tekjur en þá,“ segir í Vefriti fjármálaráðuneytisins. Um leið hafa þeir tekjuhæstu misst um helming tekna sinna.

Þeir sem voru með tekjur á bilinu tvöhundruð þúsund til 250.000 krónur er eini hópurinn sem stendur í stað milli ára, en þeir, sem tilheyra hærri tekjuhópum, hafa allir lækkað og hlutfallslega meira eftir því sem tekjurnar eru hærri.

Í heildina hafa ráðstöfunartekjur lækkað um tæp fimmtán prósent síðan í fyrra.

Fimmhundruð manns voru með yfir tvær milljónir á mánuði 2008. Þetta fólk er nú að jafnaði með eina milljón í tekjur. Þeir 4.500 sem voru með yfir milljón á mánuði eru komnir niður í 750.000 krónur að meðaltali.

Í vefritinu er einnig bent á að 37.000 manns hafi horfið af staðgreiðsluskrá skatta á tímabilinu. Um leið hafa fimmtán þúsund nýir bæst inn á hana. Samtals eru skattgreiðslur 5,6 prósentum lægri.

- kóþ