Skuggasveinar gefa út disk

Saman er komin sveit knárra heldri manna úr íslenska tónlistarbransanum sem hafa æft upp prógramm með frumsömdum lögum sem brátt koma út.

Hljómsveitin nefnist Skuggasveinar og liðsmenn eru engir aukvisar: Gunnar Þórðarson, Magnús Kjartansson, Vilhjálmur Guðjónsson, Ari Jónsson, Haraldur Þorsteinsson, Árni Jörgensen og Júlíus Hjörleifsson.

Væntanleg er frá sveitinni diskur sem skartar nýjum lögum eftir Gunnar, Vilhjálm og Árna.

Allir hafa þeir gert garðinn frægan, sumir frá því snemma á sjöunda áratugnum, aðrir skemur. Gunnar og Magnús léku síðast saman í Sléttuúlfunum ef menn muna rétt. Ari er þekktastur fyrir Roof Tops-árin sín, Haraldur á að baki langan feril sem bassaleikari og eins Vilhjálmur sem margtækur maður á hljóðfæri. Jóhann er yngstur þeirra félaga. Aðkoma Árna er úr annarri átt:

Tildrög sveitarinnar var Shadows-prógramm þar sem Árni Jörgensen var kallaður til þátttöku en hann hefur lengi komið fram með Siglfirðingagrúppu sem á rætur sínar að rekja til áranna þegar hljómsveitin Shadows var ráðandi í gítarbítli.

Gunnar Þórðarson segir að fyrir tveimur árum hafi menn komið saman í hljóðveri Villa Guðjóns á Laufásveginum og verið að spila saman á gítara. Þá hafi hugmyndin kviknað fyrir alvöru. Nú hafi sveitin tekið upp átján, nítján lög og smiðshöggið verði slegið um næstu helgi á tólf laga safn. Hvaða tónlist þetta sé? Hann svarar seint og kallar þetta einhvers konar bítl:

„Við hlaupum ekki frá okkar áhrifavöldum. Þarna er allt sungið og mikið raddað,“ segir Gunnar. Diskurinn kemur út eftir örfáar vikur.

Annars stefnir Gunnar vestur á Ísafjörð þar sem hann spilar einleikskonsert í Edinborg kl. 20.30 föstudaginn 11. september. - pbb