Leirlistamaður í rokkinu

Hljómsveitirnar DLX ATX, Bárujárn, Me the Slumbering Napoleon og Caterpillarmen leika á skemmtistaðnum Grand Rokk á laugardagskvöldið klukkan 22.00.

Hljómsveitin DLX ATX hefur vakið nokkra athygli undanfarið og þykir mjög efnileg. Sveitin leikur háværa en á tímum viðkvæma tónlist sem á rætur í rokkinu. Bassaleikara hljómsveitarinnar, hinum írska Greg Barrett, er þó margt annað til lista lagt því hann vinnur einnig við keramík.

„Ég kynntist keramík þegar ég var að vinna við fornleifauppgröft heima á Írlandi þar sem verið var að grafa upp gamlan miðaldakastala nálægt heimili mínu. Í uppgreftrinum fann ég mikið af brotum af leirmunum og heillaðist af þessu eldgamla listformi. Eftir að hafa unnið við þetta í ár fór ég í skóla í Dublin og lærði keramík. Ég hefði svo sem getað endað í einhverju allt öðru, eins og prjónaskap, en mér fannst skemmtilegast að vinna í keramík því ég hef lúmskt gaman af því að bræða hluti," segir Greg Barrett, en hann flutti hingað til lands fyrir fjórum árum ásamt íslenskri kærustu sinni.

Greg segist helst vinna með íslenskan leir búinn til úr náttúrulegum hráefnum.

„Þegar ég kom hingað fyrst hafði ég heyrt ýmislegt neikvætt um íslenska leirinn. Ég ákvað samt að prófa sjálfur að vinna með hann og safnaði prufum af leir á ferðum mínum um landið og hef þróað mismunandi tegundir af leir til að vinna úr. Hönnunin mín lítur svolítið út eins og hún hafi dottið aftan af ruslabíl miðað við þessa hreinu og látlausu hönnun sem hefur verið svo vinsæl síðustu ár," segir Greg um leirhönnun sína.

Vilji fólk kynna sér hönnun Gregs frekar er þeim bent á síðuna www.myspace.com/errrth.

- sm