Styttist í Bjarnfreðarson

Fáheyrt er að beðið sé eftir íslenskri bíómynd með jafn mikilli eftirvæntingu og beðið er eftir Bjarnfreðarsyni.Myndin verður forsýnd um helgina í Sambíóunum og verður miðasala á sýningarnar þar. Myndin tekur upp þráðinn þar sem Fangavaktin skildi við hana eða þegar Georg losnar úr fangelsi og reynir að hefja nýtt líf. Jafnframt verður brugðið upp svipmyndum af æsku Georgs sem var í meira lagi undarleg og stjórnað af baráttukonunni Bjarnfreði.

Aðstandendur Bjarnfreðarsonar hafa verið duglegir við að beita ýmsum óhefðbundnum meðulum í kynningu á myndinni. Samskiptasíðan Facebook hefur verið notuð óspart og á myndin nú fjórtán þúsund aðdáendur. Þeir bíða væntanlega allir spenntir eftir því að berja myndina augum. Þá mun Pétur Jóhann Sigfússon bregða sér í gervi Ólafs Ragnars og stjórna morgunþætti á FM 957 á föstudaginn. Ástæðan er víst sú að Ólafur Ragnar er ráðinn á útvarpsstöðina sem kynnir í myndinni um Bjarnfreðarson. Myndin verður síðan frumsýnd formlega hinn 26. desember en í aðalhlutverkum eru sem fyrr áðurnefndur Pétur, Jón Gnarr og Jörundur Ragnarsson. Leikstjóri er Ragnar Bragason en hann hefur gefið það út, formlega, að þetta verði síðasti naglinn í líkkistu þessa fyrirbæris.

Sambíóin forsýna aðra mynd um helgina. Það er The Princess and the Frog og er teiknimynd frá Disney-risanum. Myndin markar nokkur tímamót því þetta er fyrsta myndin í ansi langan tíma þar sem notast er við gömlu teiknimyndatæknina en ekki tölvutækin eins og hátturinn hefur verið á undanfarin ár. Það virðist hafa skilað sér því myndin er tilnefnd til Golden Globe-verðlaunanna.

- fgg