Hulda starfar einungis í nokkrar vikur í heilbrigðisráðuneytinu

Í síðustu viku var tilkynnt að Hulda Gunnlaugsdóttir myndi taka að sér tímabundna verkefnisstjórnun í heilbrigðisráðuneytinu. Áður hafði verið tilkynnt að hún myndi taka sér ársleyfi frá störfum sem forstjóri Landspítalans en brotthvarf hennar hefur vakið vangaveltur en innan við ár síðan hún tók við sem forstjóri spítalans.

Á vef ráðuneytisins kom ekki fram hvort Hulda myndi starfa þar þann tíma sem hún er í leyfi frá Landspítalanum eða hvort um styttri ráðningu væri að ræða. Hið rétta er að Hulda mun einungis sinna hinni tímabundnu verkefnisstjórnun í nokkrar vikur, eða út mánuðinn.

Tilkynnt var um ráðningu Huldu í stöðu forstjóra Landspítalans í lok ágúst í fyrra en hún tók við sem forstjóri um miðjan október. Fjórtán sóttu um stöðuna en auk Huldu voru þrír aðrir umsækjendur metnir vel hæfir. Hulda starfaði áður sem forstjóri Aker háskólasjúkrahússins í Ósló.

Rætt er við Huldu í Morgunblaðinu í dag og þar kemur fram að hún muni starfa afar stuttan tíma í heilbrigðisráðuneytinu. Hún segist ekki hafa vikið undan áskorunum í starfi. Áhugi hennar sé enn sá sami.

„Ástæðan fyrir þessari ákvörðun er eingöngu persónulegs eðlis. Fjölskylda mín þarf að hafa allan forgang og ég ætla að dvelja í Osló næsta árið, ásamt eiginmanni mínum og dóttur. Þessi ákvörðun hefur því ekkert með það að gera hver er heilbrigðisráðherra, eða að nú kreppir mjög að í rekstri LSH, eða að ég hafi á einhvern hátt misst áhugann á starfinu," segir Hulda.