Leppalúði með stjörnufans

Gleðigjafarnir í Baggalúti sjá um jólafjörið á Rás 2 um þessar mundir í jóladagatalinu og hluti af þeirri dagskrá er að þeir dæla út vikulegum aðventulögum. Eðli málsins samkvæmt eru tvö lög komin út – „Hvað fæ ég fallegt frá þér“ og „Jólalalagið“ – og á sunnudaginn verður þriðja lagið afhjúpað. Baggalútur er ekki í nokkrum vafa um að þetta sé metnaðarfyllsta aðventulag sveitarinnar til þessa. Það heitir „Leppalúði“ og tvær íslenskar stjörnur leggja sveitinni lið, ofurtrommarinn Gulli Briem og Ragga Gísla.

„Gulli Briem úr Mezzoforte er náttúrlega með þetta sánd sem við vorum að leita eftir og því var upplagt að fá hann,“ segir Karl Sigurðsson, söngvari Baggalúts. Jólalög hópsins eru alltaf ábreiður af þekktum erlendum slögurum en Karl segist ekki geta ljóstrað upp hvaða lag verður fyrir barðinu í „Leppalúða“.

„Ég get þó sagt að þetta lag er frá 9. áratugnum og margir héldu að inúíta-söngkona syngi það, eða jafnvel hugsanlega Ragga Gísla. Það kom svo upp úr krafsinu að það er karlmaður sem syngur lagið. Okkur fannst hins vegar upplagt að fá Röggu bara til að syngja það með okkur.“

Lagið verður afhjúpað í þætti Guðna Más Henningssonar á sunnudaginn og svo verður það aðgengilegt á baggalutur.is og á gogoyoko.com, þar sem kaupa má lagið í fullum gæðum gegn lágmarksþóknun.

Uppselt hefur verið á báða jólatónleika Baggalúts í Borgarleikhúsinu 20. desember frá því í byrjun mánaðar. „Jú, auðvitað hefðum við átt að bæta við einum aukatónleikum enn, en við erum bara ekki nógu metnaðarfullir. Því miður,“ segir Karl. - drg