Eigendaskipti hjá Portsmouth

Sulaiman Al Fahim hefur selt 90 prósenta hlut í enska úrvalsdeildarfélaginu Portsmouth til viðskiptajöfurs frá Sádí-Arabíu.

Ali Al Faraj er nú meirihlutaeigandi félagsins en aðeins eru sex vikur síðan að Al Fahim keypti félagið. Hann heldur eftir tíu prósenta hlut.

„Yfirtakan mun tryggja að framtíð Portsmouth er örugg og mun færa félaginu fjárhagslegt öryggi," segir í yfirlýsingu frá félaginu. „Það er búið að undirrita alla samninga á milli málsaðila svo hægt verði að greiða leikmönnum og stjórnarmeðlimum laun."

Al Fahim verður stjórnarformaður félagsins út næsta tímabil að minnsta kosti en Al Faraj mun taka sæti í stjórninni. Peter Storrie verður áfram framkvæmdarstjóri.

Portsmouth vann sinn fyrsta leik á tímabilinu um helgina er liðið vann Wolves, 1-0. Greint var frá því um helgina að félagið hefði ekki getað borgað leikmönnum laun í síðustu viku.

Hermann Hreiðarsson er á mála hjá Portsmouth en hefur átt við meiðsli að stríða.