Sameining til að verja heilbrigðisþjónustu á landsbyggðinni

Fjölmenni sótti borgarafund á Sauðárkróki fyrir helgi gegn áformum um að heilbrigðisstofnanir á Norðurlandi verði settar undir stjórn Fjórðungssjúkrahússins á Akureyri. Húnvetningar mótmæla líka og segja vegið harkalega að íbúum svæðisins. Á Vestfjörðum er mótmælt og bent á að á milli sunnan- og norðanverðra Vestfjarða komist enginn nema fuglinn fljúgandi í allt að 8 mánuði á ári vegna erfiðra samgangna og því vonlaust að sameina heilbrigðisstofnanir á Patreksfirði og Ísafirði. Og sunnlenskir sveitarstjórnarmenn efast um vegna landfræðilegrar sérstöðu Vestmannaeyja og Hornafjarðar að ná megi árangri með því að sameina stofnanir þeirra við Selfoss. En hvað segir ráðherrann?

Guðlaugur Þór segir að þetta hafi verið viðbúið, umræðan hafi alltaf verið með þessum hætti. Það skipti máli að koma til móts við sjónarmið og hlusta en nú þegar hefðu verið sameinaðar stofnanir á landsbyggðinni, bæði á Austurlandi og Suðurlandi, og hann hvetti fólk til að skoða reynsluna af því.

Í ræðu frammi fyrir tvöþúsund manns í Hafnarfirði gær vegna breytinga á Sánkti Jósefsspítala sagði hann að margir stjórnendur misstu vinnuna á landsbyggðinni. Það væri algerlega ljóst að margir þeir aðilar sem stýrðu þessum stofnunum, sem margar væru mjög smáar, misstu sín störf. Það væri miður en það væri gert til að viðhalda störfum hjá heilbrigðisstarfsfólki og þeirri þjónustu sem það veitir. Reynsla væri hins vegar fyrir því að sameiningar sem þessar, þótt þær taki á meðan á því stendur, skili sér í þjónustu og hagræði.