Starfar algjörlega einn og óháður

Að marggefnu tilefni vill Hörður Torfason taka fram að allt starf hans við mótmælin á Austurvelli í vetur hafi verið ólaunað og sjálfsprottin. Hann starfar einn og óháður sem listamaður með þá fullvissu að sýna verði jafnt veraldlegum sem andlegum yfirvöldum strangt aðhald.

,,Ég hef staðið fyrir friðsömum mótmælafundum þar síðan 11. október 2008 og geri enn. Tilefnið var og er mannréttindabrot á heilli þjóð. Þessu starfi hef ég sinnt af einlægri sannfæringu og heilindum," segir Hörður í tilkynningu.

Hörður segist hafa undanfarin 40 ár starfað listamaður og starf hans hafi beinst að og fjallað um mannréttindi. ,,Það er því aumur og dapurlegur áróður sem heyrist víða og jafnvel frá sumum þingmönnum úr ræðustól Alþingis og á bloggsíðum fyrrverandi ráðherra og lærisveina þeirra, að starf mitt sé fjármagnað af pólitískum flokki eða hagsmunasamtökum. Slíkar fullyrðingar eru úr lausu lofti gripnar og helber ósannindi. Þær eru settar fram í lágkúrulegum, pólitískum tilgangi í því skyni að koma höggi á pólitíska andstæðinga og grafa undan samtakamætti þjóðarinnar."