Seilast í vasa skattborgara eftir misheppnaða viðskiptahugmynd

Bæjarstjórinn á Seltjarnarnesi segir að bærinn ætli ekki að verða við kröfum um riftun á mörg hundruð milljóna kaupsamningi sem gerður var við byggingafélagið Þyrpingu. Hann segir að Þyrping ætli að reyna að sækja fórnarkostnaðinn af misheppnaðri viðskiptahugmynd í vasa skattborgara á Seltjarnarnesi.

Í kvöldfréttum okkar í gær sögðum við frá því að byggingafélagið Þyrping hafi krafist þess að mörg hundruð milljóna kaupsamningum sem félagði gerði við Seltjarnarnesbæ árið 2006 yrði rift. Forsvarsmenn Þyrpingar eru þeirrar skoðunar að Seltjarnarnesbær hafi staðið í veg fyrir að tillögur Þyrpingar um byggingarframkvæmdir út við Gróttu yrðu að veruleika þrátt fyrir að flestar þeirra rúmuðust innan aðalskipulags bæjarins.

Þyrpingarmenn ætla að stefna Seltjarnarnesbæ verði kaupsamningnum ekki rift og hljóðar krafa þeirra upp á rúman einn milljarð króna.

Jónmundur Guðmarsson er bæjarstjóri á Seltjarnarnesi. „Það hefur aldrei staðið neitt annað til en Þyrping myndi fá að byggja á þessu svæði. Vandamálið var hversu mikið og hversu hátt. Bæjaryfirvöldum ber að fara eftir aðalskipulagi, sjónarmiðum íbúa og öðrum lögum og reglum sem gilda um skipulagsmál. Í haust lagði bæjarstjórn ákveðnar línur sem beinlínis heimilaði Þyrpingu að byggja ákveðið magn á svæðinu og ekkert því til fyrirstöðu að það geti farið í gang en við heyrðum ekkert frekar frá þeim um það mál," segir Jónmundur.

Jónmundur segist vilja ná sáttum við forsvarsmenn Þyrpingar svo að þeir geti hafist handa við uppbygginga á svæðinu sem fyrst. En bæjarstjórinn segir það ekki koma til greina að borga sig út úr deilunni.

„Mér finnst mjög framhleypið að fyrirtæki sem stendur fyrir frammi fyrir kannski misheppnaðri viðskiptahugmynd ætli sér að seilast í vasa skattgreiðenda til þess að niðurgreiða fórnarkostnað af því verkefni," segir Jónmundur.