Loftlagstillagan sett fram fyrir stjórnarfrumvörp

Það er í raun búið að mynda sérstakan 36 þingmanna álversmeirihluta á Alþingi til að knýja Kolbrúnu Halldórsdóttur umhverfisráðherra til að framfylgja allt annarri stefnu en hún kærir sig um, nefnilega að tryggja Íslandi sem mestar undanþágur í nýjum alþjóðaloftlagssáttmála svo hægt sé að byggja fleiri álver. Þessi sérstaki meirihluti hefur einnig meirhlutavöld í forsætisnefnd Alþingis og umhverfisnefnd og hefur því öll tök á að koma málinu hratt í gegnum þingið, og sýndi það strax í dag þegar loftlagsmálið var sett á dagskrá og tveimur stjórnarfrumvörpum Steingríms J. Sigfússonar meira að segja vikið til hliðar.

Kolbrún kveðst virða vald meirihlutans og segir að ef tillagan verði samþykkt, og hún verði sá umhverfisráðherra sem þurfi að fylgja henni eftir, þá muni hún að sjálfsögðu gera það, "þó að það sé mér þvert um geð". Kolbrún segir hins vegar að niðurstaðan liggi í raun fyrir. Það sé skylda allra ríkja sem undirrituðu loftlagssamninginn, burt séð frá öllum aðstæðum, að fara að draga úr losun.