Carlo Ancelotti: Liverpool-liðið saknar Alonso

Carlo Ancelotti, stjóri Chelsea, er á því að Liverpool-liðið hafi misst mikið þegar félagið seldi Xabi Alonso til Real Madrid í haust. Hann segist hafa verið mjög hrifinn af samvinnu Alonso og Javier Mascherano þegar AC Milan mætti Liverpool í úrslitaleik Meistaradeildarinnar 2007. Ancelotti ætlar væntalega að nýta sér þetta þegar liðin mætast í dag klukkan 15.00 í stórleik ensku úrvalsdeildarinnar um helgina.

„Miðjan hjá Liverpool setti mikla pressu á mótherja sína því Alonso og Mascherano voru frábærir leikmenn og frábærir saman," sagði Carlo Ancelotti og bætti við:

„Lucas er ungur leikmaður sem á eftir að ná sér í meiri reynslu. Hann verður örugglega mjög góður leikmaður en Liverpool hefur misst eitthvað með Alonso," sagði Ancelotti.