Megson ætlar að gera allt til þess að halda Cahill

Varnarmaðurinn efnilegi Gary Cahill hjá Bolton hefur verið sterklega orðaður við stærri félög á borð við AC Milan og Juventus upp á síðkastið en knattspyrnustjórinn Gary Megson hjá Bolton er ekki á því að missa sinn mann.

Megson fékk hinn 23 ára gamla Cahill frá Aston Villa í janúar árið 2008 og hefur leikmaðurinn blómstrað á Reebok-leikvanginum síðan og meðal annars verið kallaður inn í landsliðshóp Fabio Capello hjá Englandi.

„Við náðum að losa okkur við klausu í samningi hans síðasta sumar sem þýddi að við hefðum þurft að selja hann fyrir ákveðna upphæð. Það var mjög jákvætt skref því við viljum alls ekki missa hann frá okkur," segir Megson í viðtali við Bolton News.