Diouf sakaður um að hafa úthúðað boltastrák

Lögreglan í Liverpool ræddi í gær við El Hadji Diouf, leikmann Blackburn, um ásakanir að hann hafi úthúðað boltastrák á leiknum í gær.

Diouf er sakaður um kynþáttafordóma í garð boltastráksins í fyrri hálfleik leiks Everton og Blackburn í gær. Hann mun hafa kvartað undan því að hafa ekki fengið boltann nægilega fljótt.

Í kjölfarið var Diouf sjálfum úthúðað af stuðningsmönnum Everton, bæði þá og svo aftur í tvígang þegar hann fór að taka hornspyrnu á sama stað.

Lögreglan í Liverpool staðfesti að hafa rætt við 28 ára gamlan mann vegna áðurnefnda ásakanna.

Everton vann leikinn, 3-0.