Leyfisveiting tekin fyrir á miðvikudag

Menntaráð Reykjavíkur tekur umsókn Menntaskólans um starfsleyfi til umsagnar á miðvikudaginn, að sögn Kjartans Magnússonar, formanns menntaráðs. Eftir að ráðið hefur gefið umsögn fer umsóknin til menntamálaráðuneytisins, sem hefur endanlegt úrskurðarvald um hvort skólinn fái starfsleyfi eða ekki. Flestir grunnskólar Reykjavíkur hefja kennslu í dag.

Menntaskólinn er grunnskóli sem á að starfa í gömlu Heilsuverndarstöðinni við Barónsstíg, ef allt gengur eftir. Búið er að skrá 40 börn í skólann, með fyrirvara um að starfsleyfi fáist, að sögn Eddu Huldar Sigurðardóttur, skólastjóra Menntaskólans.

Skóladagatal Menntaskólans gerði ráð skólabyrjun í kringum 2. september. Til þess að uppfylla skilyrði um 180 skóladaga myndi skólinn keyra lengra inn í sumarið, segir Edda.

Skráð eru 40 börn, á aldrinum 5-10 ára, fyrir komandi haustönn. Edda segir biðina eftir starfsleyfi auðvitað óþægilega óvissu fyrir foreldrana.

„Leyfisveitingin gengur ekki hraðar þó við töpum okkur,“ segir Edda en menntaráð hefur haft umsóknina til skoðunar í nokkrar vikur. - vsp