Hummer Björgólfs málaður rauður

Hummer-jeppi Björg­ólfs Thors Björgólfssonar var úðaður með rauðri málningu fyrir utan Háskólann í Reykjavík í nótt. Sömu skemmdarvargar úðuðu einnig rauðri málningu á hús Sigurðar Einarssonar, fyrrverandi stjórnarformanns Kaupþings.

Fjölmiðlum bárust tilkynningar um bæði skemmdarverkin í gærmorgun frá sama netfangi.

Skemmdarverk hafa verið unnin á heimilum fjölmargra manna úr viðskiptalífinu undanfarna mánuði. Meðal annarra sem hafa orðið fyrir málningarárásum af þessu tagi eru Bjarni Ármannsson, fyrrverandi bankastjóri Glitnis, Birna Einarsdóttir, bankastjóri Íslandsbanka, Hreiðar Már Sigurðsson, fyrrverandi forstjóri Kaupþings, Hannes Smárason, fyrrverandi forstjóri FL Group, Björgólfur Guðmundsson, fyrrverandi eigandi Landsbankans og Steingrímur Wernersson, annar eigandi Mile­stone.

Þá var kveikt í Range Rover jeppa Stefáns Hilmarssonar, fyrrverandi fjármálastjóra Baugs.

Öll málin eru óupplýst og ekki er vitað hvort sömu menn eru að verki í öllum tilvikum.

Þá hafa skemmdarverk einnig verið unnin á heimilum fólks sem tengist orkugeiranum, til dæmis Friðriks Sophussonar, forstjóra Landsvirkjunar, Rannveigar Rist, forstjóra Alcan, og Hjörleifs Kvaran, forstjóra Orkuveitunnar.