Barnaspítali Hringsins nálgast öryggismörk

Barnaspítali Hringsins nálgast öryggismörk vegna niðurskurðar, en fyrirsjáanlegt er að fækka þurfi stöðugildum og deildir verði sameinaðar.

Á Barnaspítala Hringsins er unnið mikið og óeigingjarnt starf, en yfirmönnum þar er gert að skera niður eins og annars staðar í heilbrigðiskerfinu.

Á þessu ári þarf að ná fram 10 prósenta sparnaði, sem svarar til 145 milljóna króna. Hagræðingu verður einkum náð fram með því að dregið verður úr launakostnaði - einfalda þarf læknavaktir, deildir verða sameinaðar, dagdeild verður lokað í einn dag í viku og starfsemi á barnadeild í Fossvogi verður minni á nóttunni.

Um 20 til 30 þúsund njóta umönnunar lækna og hjúkrunarfólks á barnadeildum árlega. Allt verður gert til að skerða ekki þá þjónustu, enda hefur starfsfólk það að megin markmiði að sinna öllum börnum.