Barnaverndarmálum virðist fjölga vegna kreppunnar

Vísbendingar eru um að mikla fjölgun barnaverndarmála í Reykjavík megi rekja til efnahagsástandsins. Tilkynningum frá skólum hefur fjölgað um slakari skólasókn, meiri erfiðleika og vanlíðan barna í grunnskólum. Formaður Velferðarráðs segir að borgaryfirvöld fylgist grannt með þróun mála.

Á fyrstu þremur mánuðum þessa árs hefur tilkynningum til Barnaverndar Reykjavíkur fjölgað um 40 prósent. Ástæður þess eru taldar margvíslegar, hluta þessarar fjölgunar er til að mynda sögð mega rekja til aukinnar vitundar íbúa og starfsmanna borgarinnar um nauðsyn þess að vera vakandi fyrir líðan barna við erfiðar aðstæður. Ljóst er þó að fjölgun hefur orðið á hegðunarvandamálum hjá skólabörnum og vanlíðan aukist.

„Auðvitað eru þetta vísbendingar. Það er ekki hægt að horfa fram hjá því. Við erum sérstaklega að skoða börn atvinnulausra. Breyttar aðstæður heima fyrir geta haft þau áhrif að börnunum líði ekki eins vel," segir Jórunn Frímannsdóttir formaður velferðarráðs Reykjavíkurborgar.

Óskað hefur verið eftir því að viðbragðsáætlun verði gerð til að bregðast við hugsanlegri aukningu mála og einnig hefur Reykjavíkurborg lagt til hliðar fjármagn sem ætlað er til að mæta fyrirsjáanlegum vanda.

„Við höfum gert ráð fyrir að aukning verði í þjónustu sem við þurfum að veita hér í borginni. Ég hef ekki áhyggjur af því að við getum ekki þjónustað þá sem þurfa þjónustu hjá okkur," segir Jórunn.