Umboðsmaður Alþingis hefur ekki fengið svar frá Vinnumálastofnun

Umboðsmaður Alþingis hefur ekki fengið svar frá Vinnumálastofnun vegna fyrirspurnar um nokkur atriði varðandi greiðslur á atvinnuleysisbótum.

Svarið átti að berast fyrir 1. september en tilefni fyrirspurnarinnar var frétt á Vísi þar sem fjallað var um aðstæður atvinnulausrar konu. Greiðsla atvinnuleysisbóta til hennar hafði verið frestað um mánaðamótin júní/júlí með vísan til þess að hún hafði fengið greidd mæðralaun.

Vildi Umboðsmaður Alþingis fá staðfestingu Vinnumálastofnunar á efni fréttarinnar, hversu margir hefðu af þessum sökum ekki fengið atvinnuleysisbætur sínar greiddar á réttum tíma um þessi sömu mánaðamót og hvenær þær hefðu að lokum verið greiddar.

Róbert Spanó, umboðsmaður Alþingis, segir að Vinnumálastofnun hafi fengið frest í tíu daga til að svara spurningunum. Það sé ekki óalgengt að stjórnvöld fái frest í tíu daga til að svara slíkum fyrirspurnum sem krefjist gagnaöflunar.