Birkir Jón: Svik Samfylkingarinnar

Samfylkingin hefur ekki fylgt eftir kosningaloforðum sínum og svikið fjölda fólks á landsbyggðinni. Þetta kom fram í máli Birkis Jóns Jónssonar, varaformanns Framsóknarflokksins, á Alþingi í dag í umræðum um störf án staðsetningar. Jóhanna Sigurðardóttir, forsætisráðherra, sagði að það væri eindreginn vilji stjórnvalda að sem flest störf standi fólki til boða, ekki síst á landsbyggðinni.

Birkir Jón fullyrti að verið væri að fækka mikilvægum störfum á landsbyggðinni. Hann sagði Samfylkinguna ekki hafa fylgt eftir kosningaloforðum sínum frá 2007 og 2009 um 1200 ný störf án staðsetningar. „Þetta er til skammar. Samfylkingin hefur svikið fjöldan allan af fólki vítt og breitt um landið. Skyldi það verða svo að við næstu kosningar að Samfylkingin muni halda áfram að beita sér fyrir störfum án staðsetningar."

Jóhanna sagði ekki rétt ekki hafi verið gert neitt að undanförnu. Ljóst væri að hægt væri að vinna ýmis störf óháð staðsetningu svo framarlega sem góð fjárskipti væru fyrir hendi. „Forsætisráðuneytið mun í samræmi við það leggja áherslu á það við önnur að ávallt verði vakin athygli á því í auglýsingum þegar slíkt á við og að um sé að ræða verkefni sem hægt er að vinna hvers sem er á landinu."

Þá sagði forsætisráðherra að menn verði að horfa á heildarmyndina og benti á að kreppan kæmi mun verr niður á suðvesturhorninu.

Fleiri þingmenn tóku þátt í umræðunni. Sigmundur Ernir Rúnarsson, þingmaður Samfylkingarinnar, fagnaði henni og sagði umræðuna brýna. Hann sagði á ferð sinni um Norðausturkjördæmi nýverið hafi hann skynjað ótta fólks að opinberum störfum muni á næstunni fækka á landsbyggðinni en ekki á höfuðborgarsvæðinu. „Mér finnst mjög mikilvægt að hafa eitt að leiðarljósi í þessu efni. Það er þjóðhagslega hagkvæmt að hafa störf úti á landi. Það hefur verið skoðað og niðurstaðan er afgerandi," sagði þingmaðurinn.

Einar K. Guðfinnsson, þingmaður Sjálfstæðisflokksins, sagði núverandi ríkisstjórn hafa tekið upp nýja stefnu um störf með staðsetningu í stað starfa án staðsetningar. Hann sagði ríkisstjórnina veikja stofnanir á landsbyggðinni til hægt væri að flytja verkefni þeirra til Reykjavíkur.

Birgir Ármannsson, flokksbróður Einars, gagnrýndi Jóhönnu. Niðurstaðan væri engin. „Þetta er því miður það sem einkennir hennar ágæta flokk Samfylkinguna. Það eru fögur fyrirheit og mikil loforð."