Milljarðar í ónýttum lögnum í mannlausum hverfum

Orkuveita Reykjavíkur hefur fjárfest fyrir um 2,6 milljarða króna í lögnum í hverfum sem fáir eða engir búa í. Þetta telst vannýtt, eða ónýtt, fjárfesting, þar sem litlar sem engar tekjur skila sér á móti. Þetta þykir dæmi um þá efnahags­lægð sem þjóðin er í, en ekki síst um það skipulagsleysi sem ríkt hafi á höfuðborgar­svæðinu.

Sveitarfélög hafi reist fjölda hverfa án nokkurs samráðs og beinlínis í samkeppni um íbúa. Þannig sé byggingarmagn á svæðinu langt umfram þörfina.

Orkuveitan kemur upp dreifikerfum fyrir hita, rafmagn, skólp og gagnaflutninga áður en fólk flytur í ný hverfi og tengir inn á dreifikerfi sitt. Litið er á þetta sem góða fjárfestingu, þar sem væntanlegir notendur greiða fyrir þjónustuna. Nú ber hins vegar svo við að heilu hverfin standa auð eða eru fámenn og því eru tekjurnar mun lægri en reiknað var með.

Meðal þeirra hverfa sem þetta á við um eru Helgafellsland í Mosfellsbæ, Vatnsendahlíð í Kópavogi, Úlfarsárdalur í Reykjavík, Vellir í Hafnarfirði og Urriðaholt í Garðabæ. Auk þeirra eru misjafnlega vel nýtt nýbyggingahverfi víðar á veitusvæði Orkuveitunnar á Akranesi, í Hveragerði, á Hellu og víðar.

Ofan á þessa 2,6 milljarða leggjast fjárfestingar sveitarfélaganna sjálfra. Skipulag, gatnagerð, gangstéttar og ýmis frágangur hleypur á háum upphæðum. Þá má reikna inn í aukinn hlutfallslegan kostnað við það að reka hverfi með fáum íbúum, svo sem lítið nýtta skóla með auknum skólaakstri, snjómokstur í hálftómum hverfum og svo framvegis.

Þá hafa verktakar lagt í mikinn kostnað við byggingar í hverfunum sem ekki hefur fengist greiddur þar sem ekkert selst.- kóp