Ferguson hugsanlega á leið í leikbann?

Knattspyrnustjórinn Sir Alex Ferguson hjá Englandsmeisturum Manchester United las dómaranum Alan Wiley pistilinn eftir leik Manchester United og Sunderland um helgina.

Ferguson vændi þá dómarann um að vera ekki í nógu góðu formi til að dæma leiki í úrvalsdeildinni. Í samtali við sjónvarpsstöð Manchester United sagði Sir Alex að í hvert sinn sem Wiley spjaldaði leikmann hefði það tekið hann 30 sekúndur, „ég held að hann hafi þurft að hvíla sig", sagði knattspyrnustjórinn.

Alls veifaði dómarinn spjaldinu 6 sinnum í leiknum. Og miðað við reiknireglu Sir Alex hefði dómarinn átt að lengja uppbótartímann en Manchester-liðið þjarmaði duglega að Sunderland undir lokin en náði aðeins að jafna metin og þurfti að sjá á eftir forystusætinu til Chelsea. Enska

knattspyrnusambandið ætlar að fara yfir upptöku af viðtalinu og gæti í kjölfarið dæmt Ferguson til að sitja upp í stúku þegar United spilar næsta deildarleik.