United útilokar ekki að kaupa Tevez

David Gill, framkvæmdarstjóri Manchester United, hefur ekki útilokað að félagið muni greiða þær 25,5 milljónir punda sem þarf til að losa Carlos Tevez undan samningi sínum við Kia Joorabchian.

Joorabchian á samningarétt Tevez og hefur sett 25,5 milljóna punda verðmiða á Tevez. Gill finnst það fremur hátt verð.

„En þar með er ekki sjálfgefið að við munum ekki borga þá upphæð," sagði Gill í samtali við breska fjölmiðla.

Tevez hefur skorað fimmtán mörk á tímabilinu, þar af fjögur í einum og sama leiknum gegn Blackburn í deildabikarnum. Hann hefur áður komið fram í fjölmiðlum og lýst yfir vonbrigðum sínum með að framtíð hans hjá United sé í óvissu.