Tekst það loksins hjá Fylki í tólftu tilraun?

Fylkir heimsækir Keflavík í 13. umferð Pepsi-deild karla í kvöld. Árbæjarliðið á enn eftir að vinna leik í efstu deild í Keflavík en liðin mætast þarna í tólfta sinn.

Keflavík hefur unnið heimaleik sinn á móti Fylki undanfarin tvö sumur og alls fagnað sigri í sjö af ellefu leikjum liðanna í efstu deild. Hinir fjórir innbyrðisleikir liðanna í Keflavík hafa endað með jafntefli.

Keflavíkurliðið er líka taplaust í sex heimaleikjum sínum í sumar og hefur náð þar í 16 af 18 mögulegum stigum í boði. Eini heimaleikurinn sem Keflavík hefur ekki náð að vinna var 1-1 jafntefli á móti Stjörnunni þar sem gestirnir úr Garðabæ jöfnuðu leikinn í uppbótartíma.

Leikir Keflavíkur og Fylkis í Keflavík í efstu deild:

2008 Keflavík-Fylkir 2-1

2007 Keflavík-Fylkir 1-0

2006 Keflavík-Fylkir 1-1

2005 Keflavík-Fylkir 2-2

2004 Keflavík-Fylkir 4-2

2002 Keflavík-Fylkir 3-1

2001 Keflavík-Fylkir 2-1

2000 Keflavík-Fylkir 1-1

1996 Keflavík-Fylkir 0-0

1993 Keflavík-Fylkir 2-1

1989 Keflavík-Fylkir 1-0