Umfjöllun: Eyjamenn unnu frækinn sigur gegn Blikum í rússíbanaleik

ÍBV vann frækinn 3-4 sigur gegn Breiðabliki í Pepsi-deild karla á Kópavogsvelli í kvöld en staðan var 1-2 í háfleik fyrir ÍBV.

Varamennirnir stálu hins vegar senunni í seinni hálfleik. Fyrst komust Blikar yfir 3-2 með mörkum varamannanna Guðmundar Péturssonar og Guðmanns Þórissonar en varamaðurinn Augustine Nsumba átti ótrúlega innkomu á 79. mínútu og skoraði tvö mörk á lokakafla leiksins og tryggði ÍBV 3-4 sigur í bráðfjörugum leik.

Gestirnir í ÍBV byrjuðu leikinn annars af miklum krafti í kvöld og Englendingurinn Ajay Smith skoraði fyrsta mark leiksins strax á 3. mínútu. Hann afgreiddi boltann þá í netið af stuttu færi eftir klafs í vítateig Blika.

Blikar voru smá tíma að átta sig á aðstæðum en náðu þó að jafna leikinn á 17. mínútu með góðu marki frá Kristni Steindórssyni sem komst einn inn fyrir vörn ÍBV, lék á markvörðinn Elías Fannar Stefnisson og renndi boltanum í autt markið.

Það tók Eyjamenn þó aðeins fjórar mínútur að ná forystunni að nýju þegar Christopher Clements tók sig til og lék á tvo varnarmenn Blika og skoraði af öryggi framhjá Ingvari Þór Kale í marki Blika.

Gestirnir urðu hins vegar fyrir blóðtöku á 26. mínútu þegar fyrirliðinn Andri Ólafsson þurfti að yfirgefa völlinn vegna meiðsla en Eyjamenn héldu þó haus og voru sterkari aðilinn það sem eftir lifði hálfleiksins.

Hvorugu liðinu tókst þó að skora og staðan því 1-2 þegar flautað var til hálfleiks.

Blikar gerðu tvöfalda skiptingu í hálfleik þegar þeir Guðmann Þórisson og Guðmundur Pétursson komu inn á fyrir Kristinn Jónsson og Finn Orra Margeirsson og skiptingin var ekki lengi að skila sér fyrir Blika.

Á 53. mínútu skoraði Guðmundur gott skallamark eftir aukaspyrnu Blika utan af kanti. Markið gaf Blikum mikinn kraft en Eyjamenn virtust að sama skapi slaka heldur til of mikið á og misstu öll tök á leiknum.

Á 72. mínútu skiluðu hálfleiksskiptingar Blika aftur árangri þegar Guðmann var réttur maður á réttum stað í vítateig ÍBV og skoraði með góðu skoti og kom Blikum yfir, 3-2.

Eyjamenn neituðu hins vegar að gefast upp og lögðu allt kapp á sóknarleikinn og það skilaði sér heldur betur.

Varamaðurinn Augustine Nsumba varð bjargvættur ÍBV en hann var nýkominn inn á þegar hann átti skot sem hafði viðkomu í Matt Garner og sló Ingvar Þór alveg út af laginu í marki Blika.

Nsumba var þó ekki hættur því tveimur mínútum síðar skoraði hann sigurmark leiksins, 3-4, í bráðfjörugum rússíbanaleik.

Sannarlega risastór þrjú stig sem Eyjamenn sóttu á Kópavogsvöll en að sama skapi mikil vonbrigði fyrir Blika, að tapa öðrum leiknum í röð gegn liði í botnbaráttunni.

Tölfræðin:

Breiðablik - ÍBV 3-4

0-1 Ajay Leitch-Smith (3.)

1-1 Kristinn Steindórsson (17.)

1-2 Christopher Clements (21.)

2-2 Guðmundur Pétursson (53.)

3-2 Guðmann Þórisson (72.)

3-3 Matt Garner (82.)

3-4 Augustine Nsumba (84.)

Kópavogsvöllur, áhorfendur 728

Dómari: Erlendur Eiríksson (7)

Skot (á mark): 11-12 (7-7)

Varin skot: Ingvar Þór 3 - Elías Fannar 4

Horn: 3-6

Aukaspyrnur fengnar: 14-12

Rangstöður: 2-2



Breiðablik 4-3-3

Ingvar Þór Kale 5

Arnór Sveinn Aðalsteinsson 4

Elfar Freyr Helgason 4

Kári Ársælsson 5

Kristinn Jónsson 4

(46., Guðmann Þórisson 7)

Finnur Orri Margeirsson 4

(46., Guðmundur Pétursson 6)

Andri Rafn Yeoman 6

Arnar Grétarsson 7

(66., Guðmundur Kristjánsson 5)

Olgeir Sigurgeirsson 6

Alfreð Finnbogason 4

Kristinn Steindórsson 7

ÍBV 4-3-3

Elías Fannar Stefnisson 7

Pétur Runólfsson 6

(79., Gauti Þorvarðarson -)

Andrew Mwesigwa 7

Eiður Aron Sigurbjörnsson 6

Matt Garner 6

*Christopher Clements 8 - Maður leiksins

Yngvi Borgþórsson 5

(79., Augustine Nsumba -)

Andri Ólafsson 5

(26., Viðar Örn Kjartansson 6)

Tonny Mawejje 6

Ajay Leitch-Smith 7

Þórarinn Ingi Valdimarsson 6

Boltavakt Vísis og Fréttablaðsins var með beina lýsingu frá leik Breiðaliks og ÍBV í 13. umferð Pepsi-deildar karla.

Smelltu hér til að opna Boltavaktina og lesa lýsingu leiksins: Breiðablik - ÍBV

Þá er einnig hægt að nálgast Boltavaktina í Vodafone Live! farsímaþjónustunni.