Næst verður tekið á yfirveðsetningunni

Vandinn sem fylgir skuldum sem heimilin ráða ekki við að borga af stendur í vegi fyrir endurreisn, og á því verður að taka, sagði Árni Páll Árnason félagsmálaráðherra á fundi um skuldastöðu heimilanna í gær.

Hann sagði að nú, þegar aðgerðir stjórnvalda til að taka á skuldavanda heimilanna væru tilbúnar, yrði að taka á yfirveðsetningu húsnæðis, þeim tilvikum þar sem áhvílandi lán væru hærri en andvirði fasteignar. Búast mætti við því að viðskiptabankarnir kæmu með tillögur um slíkar aðgerðir á næstunni.

Enn hafa aðgerðir stjórnvalda til að taka á skuldavanda heimilanna ekki verið kynntar formlega. Samkvæmt heimildum Fréttablaðsins er stefnt að því að slík kynning fari fram í dag.

Árni sagði í gær að markmiðið með aðgerðum stjórnvalda væri ekki að gera fasteignaeigendur eins setta og þeir voru fyrir hrun. Markmiðið væri að milda það högg sem heimili og fjölskyldur hefðu orðið fyrir vegna hrunsins.

Aðgerðir stjórnvalda verða tvíþættar, sagði Árni Páll á fundinum í gær.

Almennu aðgerðunum er ætlað að styðja við greiðslugetu fólks með því að koma greiðslubyrði nærri því sem hún var fyrir hrunið. Við það mun höfuðstóllinn hækka, og þá er mögulegt að afskrifa þurfi hluta höfuðstólsins síðar, batni efnahagsástandið hér á landi ekki.

Með slíkum aðgerðum eru gefin fyrirheit um að á meðan aðstæður séu erfiðar og launaþróun lakari en þróun neysluverðsvísitölu, og á meðan atvinnuleysi sé hátt, geti fólk borgað af lánum sínum miðað við þær aðstæður.

Árni Páll sagði augljóst að reyna myndi á frekari úrræði fyrir fjölda fólks, trúlega nokkur þúsund. Þá þyrfti að grípa til sértækari aðgerða, en mikilvægt væri að hægt yrði að leysa úr vanda þessa hóps á einfaldan og fljótlegan hátt, án aðkomu dómstóla. Þá yrði greiðsluaðlögun áfram í boði fyrir þá sem ekki ættu önnur úrræði.

Forðast yrði sömu mistök og hefðu verið gerð í fyrri kreppum, þar sem fólk hefði þurft að draga á eftir sér langan skuldahala árum saman. Mikilvægt væri að leyfa fólki að komast fljótt á fætur aftur, svo svört atvinnustarfsemi yrði ekki algengari en nú.