Búið að slökkva eldinn

Búið er að slökkva eld sem kom upp í Húsaskóla á tíunda tímanum í kvöld. Eldurinn læsti sig í klæðningu hússins og er hún töluvert skemmd samkvæmt upplýsingum fá slökkviliðinu.

Verið er að reykræsta bókasafnið, sem er á annarri hæð hússins, en talið er að minniháttar skemmdir gætu hafa orðið þar af völdum reyks. Samkvæmt upplýsingum fréttastofu unnu um sextán manns að því að slökkva eldinn þegar mest var, en margir þeirra eru nú komnir í önnur verkefni.

Fréttastofa RÚV segist hafa fyrir því heimildir að grunur leiki á að kveikt hafi verið í en Vísir hefur ekki fengið þær heimildir staðfestar.