Svíar elska Skip Stefáns Mána

Skipið eftir rithöfundinn Stefán Mána er spennusaga ársins að mati gagnrýnanda Kristianstadsbladet í Svíþjóð.

„Hann fær bækur okkar besta rithöfundar, Stiegs Larsson, til að líta út eins og texti í sunnudagaskóla,“ segir gagnrýnandinn. Bætir hann við að bókin hefði verið kjörin bíómynd fyrir hinn látna meistara Stanley Kubrick til að leikstýra. Einnig segir hann að Stefán Máni sé Samuel Beckett spennusagnanna.

„Þetta er alveg frábært,“ segir Stefán Máni. „Ég er forfallinn Stanley Kubrick-aðdáandi og það væri draumur í dós ef kannski þrítugur Stanley Kubrick fengi að spreyta sig á þessu. Mér finnst æðislegt hrós að hann sé nefndur í þessu samhengi en Stieg Larsson hef ég ekki lesið ennþá.“

Stefán er einnig sérlega ánægður með samanburðinn við írska Nóbelsverðlaunaskáldið Samuel Beckett. „Ég er einmitt líka mikill aðdáandi hans. Mér finnst þetta æðislegt, hvort sem ég stend undir þessu eða ekki. Ég hef alltaf verið með sterka taug í súrrealisma, þannig að ég skil þetta alveg.“

Skipið hefur áður fengið góða dóma í Þýskalandi og í Danmörku, þar sem Jyllands Posten gaf bókinni fjórar stjörnur af fimm mögulegum. Bókin kemur næst út í Frakklandi strax eftir áramót og nefnist þar Næturfarmur, eða Cargo de nuit. Bók Stefáns, Ódáðahraun, verður svo að öllum líkindum gefin út í Danmörku síðar á næsta ári.

Hvað varðar kvikmyndaréttinn að Skipinu sem Zik Zak hafði tryggt sér þá er hann aftur kominn í hendurnar á Stefáni Mána. „Rétturinn er runninn út og hefur ekki verið endurnýjaður þannig að ég er aftur kominn með boltann í hendurnar,“ segir hann.- fb