Þór og Danni í heilsuræktina

„Það er lagt upp með að þeir séu komnir á fullt í heilsugeiranum og ætli að hasla sér völl í heilsurækt,“ segir leikarinn og bókaútgefandinn Karl Ágúst Úlfsson. Á teikniborðinu er nú loks kominn vísir að handriti fyrir næstu Líf-mynd og hefur því verið gefið vinnuheitið Heilbrigt líf.

Karl mun skrifa handritið ásamt þingmanninum Þráni Bertelssyni en Gísli Örn Garðarsson verður að öllum líkindum framleiðandi myndarinnar. Karl og Eggert Þorleifsson verða síðan að sjálfsögðu í hlutverkum hinna geðþekku og seinheppnu félaga, Danna og Þórs, en ekki er enn ákveðið hver mun setjast í leikstjórastólinn. Hinar myndirnar þrjár, Nýtt líf, Dalalíf og Löggulíf, nutu allar mikilla vinsælda á níunda áratug síðustu aldar en þær fjölluðu um þá Þór og Danna sem áttu fremur auðvelt með að koma sér í klandur hvar sem þeir drápu niður fæti, meðal annars í fiskvinnslu í Eyjum. Fréttablaðið greindi frá því í nóvember í fyrra að fjórmenningarnir Þráinn, Karl, Eggert og Gísli hefðu hist á fundi og rætt um hugsanlega endurkomu þessa tvíeykis. Þá lá ekki fyrir söguþráður og allt virtist í fremur lausu lofti.

Karl útilokar ekki að þekktu fólki úr heilsuræktarbransanum bregði fyrir í kvikmyndinni og er þar af nógu að taka: Jónína Ben., Björn Leifs í World Class, Gillzenegger og Ágústa Johnsen að ógleymdri Lindu Pé. „Fólk hefur náð miklum hæðum í þessu fagi og það er alveg vel líklegt að einhverjir þeirra komi við sögu í eigin persónu.“- fgg