Trukk sett í sameiningu sveitarfélaga

Kristján Möller, ráðherra sveitarstjórnarmála, og Halldór Halldórsson, formaður Sambands sveitarfélaga, hafa ákveðið að hefja vinnu við mótun tillagna um leiðir til frekari sameiningar sveitarfélaga. Er það liður í átaki til eflingar sveitarstjórnarstigsins.Undirrituðu þeir samkomulag þess efnis í gær.

Í ákvörðuninni felst að skipa fjögurra manna nefnd til að ræða og meta sameiningarkosti í hverjum landshluta. Á hún að kynna sér stöðumála í einstökum landshlutum og viðhorf sveitarstjórnarmanna og almennings til sameiningar. Að því búnu á hún að leggja drög að tillögum um sameiningarkosti í hverjum landshluta fyrir sig.

Stefnt er að því að nefndin ljúki tillögugerð sinni á næsta ári og hún lögð fyrir landsþing eða aukalandsþing Sambands sveitarfélaga.

Með samkomulaginu er farið bil beggja. Kristján Möller hefur lýst þeim vilja sínum að lágmarksíbúafjöldi sveitarfélaga verði þúsund en hann er nú bundinn við 50 manns. Samband sveitarfélaga hefur lagst gegn lögþvinguðum sameiningum.

Sveitarfélögin eru í dag 77 og hefur þeim fækkað mikið síðari ár. Fyrir fimmtán árum voru þau 171.

Í44 sveitarfélögum eru íbúar undir þúsund. Í sex sveitarfélögum eru íbúarnir yfir tíu þúsund.

Könnun sem gerð var meðal sveitar­stjórnarmanna leiðir í ljós að meirihluti er fyrir því að lögbundinn lágmarksfjöldi íbúa verði þúsund. 63 prósent svöruðu spurningu þar að lútandi játandi. Nei sögðu 36 prósent.

Fylgjendum fjölgar eftir því sem þeir koma úr fjölmennari sveitarfélögum. Í flokki fámennustu sveitarfélaganna – með íbúum undir 500 – er hið öndverða uppi á teningnum, í honum er meirihlutinn andvígur hækkun lágmarksins.

Við undirritun samkomulagsins rómaði Kristján Möller ákvörðun sveitarstjórnarmanna á Austurlandi frá því á laugardag þess efnis að kanna möguleika á sameiningu allra níu sveitarfélaga fjórðungsins í eitt. Lýsti hann jafnframt ánægju með hliðstæða ákvörðun sveitarstjórnarmanna á Vestfjörðum.