Adebayor sér eftir brotinu á van Persie en ekki fagninu

Framherjinn Emmanuel Adebayor hjá Manchester City hefur nú setið af sér leikbannið fyrir að traðka á hausnum á Robin van Persie fyrrum liðsfélaga sínum hjá Arsenal í leik liðanna á dögunum.

Adebayor gerði allt brjálað í leiknum eins og fjallað hefur verið um því ásamt brotinu á van Persie fagnaði Adebayor einnig marki sínu í 4-2 sigri City beint fyrir framan stuðningsmenn Arsenal.

„Ég sé vissulega eftir brotinu á van Persie því þetta er einn af þeim hlutum sem má ekki gera í fótbolta og ef brotið yrði á mér með þessum hætti þá yrði ég örugglega mjög sár og pirraður.

Ég sé hins vegar ekki eftir fagninu því stuðningsmenn Arsenal voru búnir að vera að svívirða mig og foreldra mína með köllum allan leikinn og þegar ég skoraði þá vildi ég sýna þeim hverju þeir voru að missa af fyrir að selja mig í sumar. Ég vildi vera áfram hjá Arsenal en mér var ýtt út úr félaginu," segir Adebayor í viðtali við Evening Standard.