Van der Sar: Verð tilbúinn fyrir leikinn gegn Bolton

Markvörðinn Edwin van der Sar hjá Manchester United er sem kunnugt er búinn að ná sér af handarmeiðslum og lék heilan leik með varaliði United í gærkvöldi.

Hollendingurinn stefnir á að vera klár að nýju með aðalliðinu þegar það mætir Bolton 17. október næstkomandi.

„Ég verð tilbúinn fyrir leikinn gegn Bolton. Mér líður vel og ég hef enn tíu daga til þess að gera mig klárann. Mér fannst kjörið að nota varaliðsleikinn til þess að koma mér af stað og það gekk bara fínt," segir hinn 39 ára gamli van der Sar í viðtali við MUTV.