Forráðamenn Everton segja að 99 prósent líkur séu á því að Phil Neville þurfi ekki að gangast undir aðgerð vegna hnémeiðsla sinna.
Neville skaddaði liðbönd í hné í leik Everton gegn Fulham í síðasta mánuði og hefur ekkert geta spilað síðan þá.
Hann hefur nú tvívegis verið skoðaður af sérfræðingi sem segir yfirgnæfandi líkur á því að Neville þurfi ekki í aðgerð.
„Það á aldrei að segja aldrei en við erum ánægðir með hvernig Phil hefur gengið í sinni endurhæfingu," sagði Mick Rathbone, aðalsjúkraþjálfari félagsins, á heimasíðu Everton.
Þeir Steven Pienaar og Joseph Yobo hafa báðir átt við meiðsli að stríða en búist er við því að þeir verði orðnir klárir í slaginn fyrir leik liðsins gegn Wolves um þarnæstu helgi.
Til stóð að Pienaar kæmi með landsliði Suður-Afríku til landsins í næstu viku en hann þurfti að draga sig úr hópnum vegna meiðslanna.
