Lærðu lingóið á Hrauninu

„Þetta er Hraunslingó, sem sagt lúxusrassgat,“ segir Ragnar Bragason, leikstjóri Fangavaktarinnar.

Lúxusrassgat er nýyrði sem kom fram í Fangavaktinni á sunnudag. Samfangi Georgs og Daníels nefndi við þann síðarnefnda að mamma hans væri með lúxusrassgat, en þau rúma meira magn af fíkniefnum en hefðbundin rassgöt. Nýyrðið heyrðu Ragnar og félagar á Litla-Hrauni.

„Þegar við vorum að byrja á handriti síðasta haust fórum við í nokkrar heimsóknir upp á Hraun og hittum menn og áttum spjall, bæði við fanga og fangaverði,“ segir Ragnar. „Við fengum ráð um hvernig hlutirnir færu fram og hvaða tungumál væri notað. Við reyndum að hafa þetta eins trúverðugt og hægt var. Við erum ekki að búa til ímyndað Litla-Hraun. Við erum að reyna að nýta okkur sögur sem við höfum heyrt, þó að allt sé stílfært.“

Inntur eftir nánari útskýringu á lúxusrassgötum hefur Ragnar svör á reiðum höndum.

„Venjulegt rassgat tekur svona 80 til 100 grömm, en lúxusrassgat getur tekið allt að tvöfalt meira en það,“ segir hann.

„Þetta er bara beint upp úr samtölum við menn. Menn hafa í gegnum tíðina fundið sér ýmsar smyglleiðir með eiturlyf og annan varning inn á Hraunið. Þetta er ein af þeim.“ - afb