Evans lofar að bæta sig

Jonny Evans, varnarmaður Man. Utd, hefur lofað því að bæta leik sinn en hann hefur viðurkennt að hafa spilað eins öruggt og hann gat í fyrra og ekki tekið neina óþarfa áhættur.

Þrátt fyrir það stóð strákurinn sig frábærlega og átti marga magnaða leiki í rauða búningnum.

„Ég er enn að læra og sífellt að bæta mig en mér finnst ég eiga mikið inni. Síðasta tímabil var ágætt hjá mér en mér fannst ég vera fullmikið inn í skel. Ástæðan fyrir því er að það var mitt fyrsta tímabil með liðinu og ég hugsaði bara um varnarleikinn.

Það var meðvituð ákvörðun að spila bara öruggt og passa upp á að ég gæfi ekki nein mörk. Varnarleikurinn var númer eitt, tvö og þrjú. Í ár vil ég fá boltann meira og reyna að sýna hvað í mér býr. Ég ætla kannski ekki að sóla upp allan völlinn en ætla að gera mig meira gildandi á vellinum," sagði Evans sem á enn eftir að skora fyrir United.