Frestur til að höfða riftunarmál lengdur

Slitastjórnir gömlu bankanna fá lengri frest en áður til að höfða mál til að fá óeðlilegum fjármálagjörningum rift, samkvæmt frumvarpi sem Gylfi Magnússon efnahags- og viðskiptaráðherra kynnti í ríkisstjórn í gærmorgun. Slitastjórnirnar höfðu lýst áhyggjum af of skömmum fresti í bréfi til tveggja ráðuneyta. „Okkar mat var að það væri alveg rétt," segir Gylfi.

Slitastjórnirnar lýstu einnig öðrum áhyggjum, meðal annars af því að gloppa í lögum um varnarþing gerði það að verkum að þeir sem færðu lögheimili sín til útlanda lentu í vari fyrir riftunarmálum. Gylfi segir þetta mál lögfræðilega flókið og verði líkast til í skoðun fram yfir jól. - sh