Mikilvægt að bankar fari að reglum

Lilja Mósesdóttir, þingmaður VG og formaður efnahags- og viðskiptanefndar, segir afar mikilvægt að settar verði leikreglur um fjárhagslega endurskipulagningu bankanna. Hún hefur boðað Gylfa Magnússon, efnahags- og viðskiptaráðherra, á fund nefndarinnar á morgun.

Guðlaugur Þór Þórðarson, þingmaður Sjálfstæðisflokksins, vakti athygli á málinu á þingfundi í dag. Hann sagði ljóst að bankarnir væru að afskrifa skuldir fyrirtækja án reglna og því væri ekkert gegnsæi í aðgerðum þeirra.

„Við vitum öll að það þarf að afskrifa skuldir fyrirtækja en það er hinsvegar algjörlega ljóst að það er ekkert traust á bönkunum eins og staðan er núna. Það er gríðarlega alvarlegt," sagði þingmaðurinn.

Guðlaugur sagði sig og aðra fulltrúa stjórnarandstöðunnar í efnahags- og viðskiptanefnd, kallað eftir því að tekin verði saman skýrsla um málið þar sem lagðar verðir tillögur til úrbóta. Hann spurði Lilju hvort að þetta verði gert.

Lilja sagði nefndina hafa reynt að sinna eftirlitshlutverki sínu og kalla til aðila úr bankakerfinu og eftirlitsstofnunum til að ræða verklagsreglur bankanna. „Þær upplýsingar sem komið hafa fram á þessum fundum benda til þess að ekki sé verið að fara eftir samræmdum reglum og lögum. Því hef ég sem formaður viðskiptanefndar boðað hæstvirtan efnahags- og viðskiptaráðherra á fund nefndarinnar á morgun."

Lilja sagðist vonast til þess að ráðherrann myndi svara því hvernig tryggt sé að verklagsreglur bankanna séu í samræmi við lög, að eftirlit með framkvæmd verklagsreglna sé virt og að jafnfræði sé gætt á milli banka og ólíkra viðskiptavina.

„Viðskiptalegar skynsamlegar ákvarðanir bankanna, eins og það heitir á máli Samkeppniseftirlitsins, eru ekki alltaf í samræmi við hagsmuni almennings og því er mjög brýnt að settar verði leikreglur um fjárhagslega endurskipulagningu bankanna," sagði Lilja.