Afstaða borgarinnar er skýr

„Ég get lítið annað sagt um þetta mál en að fyrir liggur skýr afstaða borgaryfirvalda um að alhliða samgöngumiðstöð rísi við Hlíðarfótinn. Það kemur fram í minnisblaði sem Reykjavíkurborg og ríkisvaldið undirrituðu í apríl,“ segir Hanna Birna Kristjánsdóttir borgarstjóri um hugmyndir um að reist verði ný flugstöð í stað samgöngumiðstöðvar.

„Í ljósi þess samkomulags hlýtur samgöngumiðstöð að vera fyrsti kostur beggja aðila. Við munum vinna í samræmi við gildandi samkomulag á meðan óskir um annað hafa ekki borist með formlegum hætti frá samgönguyfirvöldum,“ segir Hanna Birna. Hún segir að eins og áður hafi komið fram í máli Júlíusar Vífils Ingvarssonar, formanns skipulagsráðs, hafi engar formlegar viðræður átt sér stað um málið.

Hanna Birna aftekur með öllu að stefnubreyting hafi orðið um málið á vettvangi borgarstjórnar og segir ekki tímabært að tjá sig um hvaða persónulegu skoðun hún hafi á því að ný flugstöð rísi í stað samgöngumiðstöðvar.

„Það er ástæðulaust að ræða það á þessum tímapunkti. Á meðan ekki berst formlegt erindi frá samgönguyfirvöldum vinnum við eftir gildandi samkomulagi.“- shá