Stjórnarmaður í Everton: Moyes er besti stjórinn í heimi

Bill Kenwright, stjórnarmaður Everton, hefur mikla trú á sínum manni, David Moyes. Þegar kemur að því að svara því hver sé besti stjórinn í heimi þá talar hann ekki um Sir Alex Ferguson, Jose Mourinho eða Guus Hiddink. Nei, besti stjóri í heimi að hans mati er David Moyes, stjóri Everton.

„Everton-fólk á David Moyes allt sitt að þakka. Hann tók við liðinu þegar félagið var á hnjánum," sagði Bill Kenwright í viðtali við BBC.

„Við skipulögðum framtíðina og hann hefur farið eftir því skipulagi í einu og öllu. Ég dýrka manninn og hann er besti stjóri í heimi," sagði Kenwright en Moyes tók við Everton árið 2002.

Bill Kenwright var kannski enn í sigurvímu eftir að Everton tryggði sér sæti í bikarúrslitaleiknum á sunnudaginn en Moyes á engu að síður hrós skilið fyrir að koma félaginu aftur í hóp þeirra bestu.

„Við þurftum að horfa á eftir Wayne Rooney og við höfum ekki haft neina peninga milli handanna. Samt sem áður erum við komnir upp í hóp sex bestu liðina," sagði Kenwright.