Löngu tímabær Bítlaútgáfa

Bítlarnir eru á allra vörum um þessar mundir, bæði vegna nýs tölvuleiks og vegna þess að fjórtán plötur þeirra eru að koma út í endurhljóðblönduðum útgáfum.

Á sama tíma og nýjar endurhljóðblandaðar útgáfur virðast koma út með sama flytjanda á nokkurra ára fresti hefur varla verið hreyft við Bítlaplötunum í 22 ár, eða síðan Capitol/EMI gaf gömlu vínylplöturnar út á geisladiskum í fyrsta sinn. Mörgum Bítlaaðdáendum þótti hljómurinn á diskunum ekki komast nálægt vínylplötunum í gæðum og allar götur síðan hefur eftirspurnin aukist jafnt og þétt eftir vönduðum útgáfum sem hæfa þeirri frábæru hljómsveit sem Bítlarnir sannarlega voru.

Hópur sérfræðinga í Abbey Road-hljóðverinu í London, öðru heimili Bítlanna, eyddi fjórum árum í endurhljóðblöndun platnanna með aðstoð nýjustu tækni og vísinda. Á sama tíma pössuðu þeir sig á því að halda í þá töfra sem upphaflegu upptökurnar bjuggu yfir.

Endurútgáfurnar, sem koma út næsta miðvikudag, samanstanda af öllum tólf hljóðversplötum Bítlanna, Magical Mystery Tour-plötunni og safnplötunum Past Masters Vol I. og II., sem verður komið fyrir á einum disk. Öllum fjórtán útgáfunum fylgir DVD-mynddiskur með heimildarmyndum um gerð þeirra, auk veigamikils umslags með hinum ýmsu upplýsingum. Einnig verður gefið út boxið The Beatles in Mono sem samanstendur af tíu Bítlaplötum sem voru hljóðblandaðar í mono-útgáfu.

Á miðvikudag kemur einnig út tölvuleikurinn The Beatles: Rock Band sem er ætlað að ná til yngri Bítlaaðdáenda. Leikurinn er sá þriðji í Rock Band-seríunni en áður hafa komið út Rock Band I og II. Í leiknum geta fjórir þátttakendur spilað samtímis eins og hljómsveit með aðstoð „hljóðfæra“ og hljóðnema. Einnig geta þeir raddað rétt eins og Bítlarnir voru þekktir fyrir. Í leiknum eru 45 lög frá öllum ferli sveitarinnar auk þess sem Bítlarnir sjálfir sjást spila lögin með aðstoð sýndarveruleika.

Leikurinn var gerður með samþykki og aðstoð Apple Corps, fyrirtækis Bítlanna, þar á meðal þeirra Pauls McCartney og Ringos Starr. Að auki tók Dhani, sonur George Harrison, þátt í gerð leikjarins og einnig Giles Martin, sonur upptökustjóra Bítlanna, George Martin.