Umfjöllun: Sjö sigurleikir í röð hjá FH

Íslandsmeistarar FH eru á svakalegri siglingu í Pepsi-deildinni og unnu sinn sjöunda leik í röð þegar Þróttur kom í heimsókn. Lokatölur í Krikanum 4-0 fyrir FH.

FH-ingar voru lengi að brjóta baráttuglaða Þróttara niður og fyrsta markið kom ekki fyrr en eftir 43 mínútna leik.

Eftir markið féll Þrótturum allur ketill í eld og þeir áttu aldrei möguleika gegn Íslandsmeisturunum í síðari hálfleik.

Það var synd því fram að fyrsta markinu varðist liðið vel og skipulega. Skyndisóknir liðsins voru einnig ágætar og þeir náðu oftar en ekki að klára sínar sóknir með skotum.

Í hálfleik misstu þeir sinn besta varnarmann í leiknum, Hauk Pál Sigurðsson, af velli vegna meiðsla og það riðlaði nokkuð varnarleik liðsins.

Þess utan virtust leikmenn liðsins missa trúna á verkefninu í síðari hálfleik og ljóst að liðið er brothætt og sjálfstraustið ekki mikið.

Magnús Már var nokkuð skapandi í þeirra liði en fékk lítinn stuðning frá félögum sínum. Lykilmaðurinn Dennis Danry var heillum horfinn og Hjörtur Júlíus ekki mikið meira en áhorfandi í framlínunni. Sindri Snær varði afar vel í markinu og gat lítið gert við mörkunum fjórum.

FH-ingar sýndu mikla þolinmæði og karakter í kvöld. Létu það ekkert slá sig út af laginu þó það tæki tíma að skora. Héldu haus og bættu við sinn leik. Þeir uppskáru síðan ríkulega að lokum.

Vörnin hafði það náðugt lengstum, miðjan afar sterk og sóknarlínan alltaf stórhættuleg. Matthías með tvö mörk og að spila vel. Mikið í boltanum og lifandi. Davíð kom sterkur inn eftir því sem leið á leikinn og nafnarnir Atli Guðnason og Björnsson voru síógnandi.

FH-liðið er á mikilli siglingu, hefur mikið sjálfstraust og það verður ekki auðvelt verk að stöðva liðið miðað við formið sem þeir virðast vera í. Framundan er þó erfiður tími hjá félaginu er það tekur þátt í Evrópukeppni ofan á allt og verður áhugavert að sjá hvernig þeim gengur að leysa þann árlega hausverk.

FH-Þróttur 4-0

1-0 Matthías Vilhjálmsson (43.)

2-0 Atli Guðnason (56.)

3-0 Matthías Vilhjálmsson (86.)

4-0 Atli Viðar Björnsson (90.)

Kaplakrikavöllur.  Áhorfendur: 970.

Dómari: Valgeir Valgeirsson 7.

Skot (á mark): 24-11 (14-5)

Varin skot: Daði 5 – Sindri 8

Horn: 6-5

Aukaspyrnur fengnar: 12-12

Rangstöður:  7-1

FH (4-3-3)

Daði Lárusson 6

Guðmundur Sævarsson 6

Tommy Nielsen  6

Pétur Viðarsson  6

Hjörtur Logi Valgarðsson  7

Davíð Þór Viðarsson  7

Ásgeir Gunnar Ásgeirsson  6

(75., Björn Daníel Sverrisson  -)

Matthías Vilhjálmsson  8 – Maður leiksins

(88., Tryggvi Guðmundsson  -)

Atli Guðnason  7

Atli Viðar Björnsson   7

Alexander Söderlund  5

(84., Matthías Guðmundsson  -)

Þróttur (4-5-1)

Sindri Snær Jensson  8

Jón Ragnar Jónsson  4

Kristján Ómar Björnsson  4

Haukur Páll Sigurðsson  6

(46., Kristinn Steinar Kristinsson  4)

Birkir Pálsson  4

Hallur Hallsson  4

Dennis Danry  3

Magnús Már Lúðvíksson  6

(79., Ingvi Sveinsson   -)

Morten Smidt  5

Trausti Eiríksson   2

(70., Vilhjálmur Pálmason  4)

Leikurinn var í beinni textalýsingu á Boltavakt Vísis og Fréttablaðsins og má lesa lýsingu leiksins hér: FH - Þróttur.