Matthías Vilhjálmsson: Við erum góðir

„Ég fann mig vel í kvöld er að komast í toppstand. Liðið er líka að spila allt vel og við höfum ekki fengið á okkur mark núna í fjórum leikjum í röð. Það er líka aldrei leiðinlegt að skora," sagði FH-ingurinn Matthías Vilhjálmsson og glott við tönn.

Hann skoraði tvö góð mörk í 4-0 sigrinum á Þrótti í kvöld. Þess utan spilaði hann mjög vel fyrir liðið.

„Við vitum að flest lið sem að koma hingað vilja sitja aftarlega. Það var erfitt að brjóta þá niður en við urðum bara að vera þolinmóðir. Um leið og fyrsta markið kom þá vissi ég að þetta myndi koma," sagði Matthías.

FH er núna búið að vinna sjö leiki í röð. Lá því beinast við að spyrja Matthías hvort FH væri ekki langbesta lið landsins.

„Við erum góðir en það er langt í að þetta mót sé búið. Síðustu ár höfum við verið að dala á þessum tíma. Það er ekkert unnið í þessu en það er vel af sér vikið að hafa unnið sjö leiki í röð. Við getum samt meira."