Heimir Guðjónsson: Hefðum getað skorað fleiri mörk

„Mér fannst við vera sterkari aðilinn í fyrri hálfleik en boltinn gekk ekki nógu hratt á milli. Menn voru að nota of mikið af snertingum og sérstaklega á síðasta þriðjungi vallarins," sagði Heimir Guðjónsson, þjálfari FH, eftir 4-0 sigur hans manna á Þrótti í kvöld.

„Svo komumst við sanngjarnt yfir og eftir það fannst mér við spila virkilega vel í seinni hálfleik og klára þennan leik sannfærandi. Ég er mjög sáttur því Þróttararnir eru mjög baráttuglaðir og skipulagðir. Þeir reyndust okkur erfiðir hér í fyrra," sagði Heimir en hans menn áttu allan síðari hálfleik.

„Ég átti von á Þrótturunum baráttuglaðari í seinni hálfleik en við tókum frumkvæðið og þeir misstu kannski svolítið trúna á verkefninu. Mér fannst við spila seinni hálfleikinn mjög vel en þá gekk boltinn loksins hratt í fáum snertingum. Við skoruðum fín mörk og hefðum alveg getað skorað fleiri mörk."