Gunnar Oddsson: Buðum til veislu

„Fyrri hálfleikur var allt í lagi en það var slæmt að fá mark á sig á þessum tíma. Við buðum svo hreinlega til veislu í síðari hálfleik. Gáfum frá okkur boltann á vondum stöðum og seinni hálfleikurinn var alls ekki nógu góður," sagðu Gunnar Oddsson, þjálfari Þróttar, eftir 4-0 tap hans manna gegn FH.

„Leikáætlunin gekk vel fram að markinu. Okkur tókst að loka vel á Davíð Þór sem er prímusmótorinn í spilinu þeirra. Það breyttist allt við fyrsta markið og við gerðum þeim allt of auðvelt fyrir í seinni hálfleiknum."

Það var engu líkara en Þróttarar hefðu misst trúna á verkefnið eftir fyrsta markið en fram að því varðist liðið vel og átti ágætar sóknir.

„Hlutirnir hafa ekki verið að falla með okkur í sumar og þetta er kannski ekki besti völlurinn til þess að spila á þegar sjálfstraustið er ekki alveg upp á sitt besta. Menn höfðu samt trú á verkefninu á meðan staðan var 0-0," sagði Gunnar að lokum.