Lögmanni Baldurs ofbýður vinnubrögð sérstaks saksóknara

Karl Axelsson, lögmaður Baldurs Guðlaugssonar fyrrverandi ráðuneytisstjóra í fjármálaráðuneytinu, skrifar í dag opið bréf til Ólafs Haukssonar, sérstaks saksóknara. Bréfið er birt í Morgunblaðinu og segir Karl að sér ofbjóði sú meðferð sem Baldur hefur verið látinn sæta undanfarið en hann er grunaður um að hafa brotið lög um innherjaviðskipti þegar hann seldi hlutabréf sín í Landsbankanum rétt fyrir hrun.

Í bréfinu gagnrýnir Karl ítrekaða leka hjá embætti sérstaks saksóknara og Fjármálaeftirlitinu. „Sá ítrekaði leki hefur svo alltaf átt sér stað á þeim tímapunktum þegar það hentaði ímyndarherferð viðkomandi embætta best en Baldri verst."

Lögmaðurinn segir að Baldur hafi verið hrakinn úr embætti auk þess sem eignir hans hafi verið frystar án þess að sú aðgerð hafi verið rökstudd einu orði.

Karl segir að fyrir liggi að mál Baldurs hafi verið fellt niður hjá Fjármálaeftirlitinu snemma í maí á þessu ári. Hann gefur lítið fyrir rökstuðning eftirlitsins í júlí þegar málinu var vísað til sérstaks saksóknara og að nýju upplýsingarnar fælust í fundargerðum og vinnugögnum samráðshóps um fjármálastöðugleika.

„Innherjaupplýsingarnar sem Baldur er grunaður um að hafa fengið á fundum fyrrnefnds starfshóps um fjármálastöðugleika. Í hópnum sátu fulltrúar frá forsætisráðuneytinu, fjármálaráðuneytinu (Baldur), viðskiptaráðuneytinu, Fjármálaeftirlitinu og Seðlabanka. Því er sem sagt haldið fram að Baldur kunni að hafa fengið innherjaupplýsingar á fundum sínum í starfshópi sem fulltrúi Fjármáleftirlitsins sat í!"

Þá spyr Karl hvort það geti verið að verið sé að leggja stjórnvöldum lið við að losa sig við embættismann sem talinn er óæskilegur. „Getur verið að þörfin fyrir að sýna þjóðinni skörungsskapinn hafi borið menn ofurliði? Baldur Guðlaugsson liggur sjálfsagt vel við höggi, tilvalið viðfangsefni í vinsældakapphlaupinu, enda fulltrúi kerfis og flokks, sem nú um stundir er mjög til vinsælda fallið að gera öðrum fremur ábyrgan fyrir hruni banka og efnahagskreppu," segir lögmaðurinn.

Í lok bréfsins hvetur Karl sérstakan saksóknara til þess að láta rannsókn málsins niður falla nú þegar enda sé um ólögmætar aðgerðir að ræða að mati Karls.