Sigmundur Davíð: Jóhanna veit ekki hvað felst í frumvarpinu

Formaður Framsóknarflokksins sagði í umræðum á Alþingi í dag að forsætisráðherra hafi ekki hugmynd hvað felist í lagafrumvarpinu um Icesave samkomulagið. Forsætisráðherra vísaði þeim orðum á bug. Þá sagðist ráðherrann eiga von á því að svar myndi berast frá forsætisráðherrum Breta og Hollendinga vegna bréfs sem þeim var sent í lok ágúst.

Sigmundur Davíð Gunnlaugsson, formaður Framsóknarflokksins, sagði Jóhönnu Sigurðardóttur, forsætisráðherra, beita sér fyrir lagasetningu sem fæli í sér meiri velferðarkjaraskerðingu en nokkur önnur í sögu landsins.

„Það gerir ráðherrann án þess að er því í virðist að hafa hugmynd um hvað í lögunum felst. Aftur og aftur er forsætisráðherra staðinn af því að vita ekki hvað felst í frumvarpinu um Icesave samkomulagið þó að þar geti munað um hundruðum milljarða króna sem fela sér velferðarskerðingu fyrir íslensku þjóðina," sagði flokksformaðurinn.

Sigmundur sagði að lítið hefði borið á því að málstað Íslendinga í deilunni hefði verið haldið á lofti. Þá spurði hann hver viðbrögð forsætisráðherra Breta og Hollendinga hefðu verið við bréfi Jóhönnu.

Jóhanna vísaði orðum Sigmundar á bug um að hún hefði ekki kynnt sér innihald Icesave samninganna. „Þetta er nú búið að vera aðalmálið hjá þessari ríkisstjórn og þeir eru óteljandi fundirnir þar sem farið hefur verið yfir þessi mál í einstökum atriðum og ég held að það hafi verið haldið á því máli eins vel og kostur er."

Þá sagðist Jóhanna eiga von á svörum frá starfsbræðrum sínum í Hollandi og Bretlandi. Slíkt taki tíma. „Ég vænti þess að ég fái þessi bréf. Ég var fyrst og fremst að skýra sjónarmið Íslands í þessum bréfum," sagði Jóhanna og benti á að bæði utanríkisráðherrar og fjármálaráðherrar landanna hefðu hist.

Sigmundur sagði með ólíkindum að forsætisráðherra hafi ekki verið virtur viðlits af forsætisráðherrum Hollands og Bretlands í deilum ríkjanna og þrátt fyrir það hafi ráðherrann að auki beitt sér fyrir umræddar þjóðir.

Jóhanna sagði mikilvægt að menn héldu sig við staðreyndir og fullyrti að Sigmundur hefði ítrekað farið með rangt mál eftir að hann settist á þing. „Hann var til dæmis að fara rangt mél með það að ég hefði haldið uppi málstað Hollendinga og Breta í þessari deilu. Þetta er auðvitað alrangt og ég mótmæli því að því sé haldið fram í þessum ræðustól," sagði Jóhanna.