Nærri fjörutíu frambjóðendur til Alþingis brjóta lög

Alls 37 frambjóðendur til síðustu alþingiskosninga áttu enn eftir að skila upplýsingum um kostnað við framboð sitt til Ríkisendurskoðunar í gær.

Samkvæmt upplýsingum frá Ríkisendurskoðun brjóta þessir frambjóðendur því lög um fjármál stjórnmálasamtaka, en slík brot geta numið allt að sex ára fangelsi, séu þau framin af ásetningi eða stórfelldu gáleysi.

Samkvæmt lögunum er hverjum frambjóðanda sem eyðir meira en 300 þúsund krónum í framboðið skylt að skila inn fjárhagslegu uppgjöri. Hinum sem eyða minna er skylt að skila inn einfaldri yfirlýsingu um það.

Frambjóðendurnir hafa haft ríflega hálfs árs frest til skilanna og Ríkisendurskoðun hefur ítrekað skilafrestinn, sem var til 23. október. Þá hafa sumir fjölmiðlar fjallað um þetta mál síðustu vikur, og um skilin hingað til.

Meðal þeirra sem ekki höfðu skilað inn upplýsingunum í gær eru Árni Johnsen, þingmaður Sjálfstæðisflokks, og Guðjón Arnar Kristjánsson, formaður Frjálslynda flokksins. Einnig Jórunn Frímannsdóttir, borgarfulltrúi Sjálfstæðisflokks.

Nítján frambjóðendur VG höfðu engum upplýsingum skilað og ellefu frambjóðendur Sjálfstæðisflokks.

Fimm frambjóðendur Frjálslynda flokksins og tveir frá Samfylkingu höfðu heldur ekki skilað upplýsingum.

Þegar skilafrestur rann út 25. október áttu hátt í níutíu eftir að skila. Þeim hefur því fækkað mjög.

Lárus Ögmundsson, skrifstofustjóri hjá Ríkisendurskoðun, segir enn óákveðið hvenær stofnunin kæri eftirlegukindurnar.

„Í sjálfu sér munum við halda þessari skrá opinni fyrst um sinn þannig að við uppfærum hana ef okkur berast skil, en auðvitað kemur að því að við lokum henni og þá stendur upp á okkur hvað við gerum við svörtu sauðina,“ segir hann. Lárus á þó ekki von á því að á það reyni, fólkið hljóti að skila um síðir.

klemens@frettabladid.is