Framkvæmd fyrir fimmtíu milljarða

Fulltrúar tuttugu lífeyrissjóða skrifuðu undir viljayfirlýsingu við heilbrigðisráðuneytið, fyrir hönd ríkisvaldsins, í gær, um nýjan Landspítala. Hún felur í sér að sjóðirnir koma að fjármögnun og undirbúningi við byggingu nýs spítala. Sjóðirnir tuttugu eru með 83,22 prósent af heildareignum íslenskra lífeyrissjóða.

Um mikla framkvæmd er að ræða, en heildarkostnaður við nýbygginguna verður um 33 milljarðar króna. Þar við bætist áætlaður kostnaður við ýmsan búnað spítalans, sjö milljarðar króna, og kostnaður við endurbyggingu eldra húsnæðis, um ellefu milljarðar króna. Samtals nemur kostnaður við verkefnið því 51 milljarði króna.

Nýbyggingin verður alls 66 þúsund fermetrar í þremur meginhlutum. Hönnunarvinna hefst á næsta ári og skapar störf fyrir arkitekta og hönnuði. Framkvæmdir hefjast á síðari hluta ársins 2011 og standa fram á árið 2016. Meginþungi verkefnisins verður árin 2013 til 2015, en reiknað er með að framkvæmdin skapi 2.644 ársverk.

Arnar Sigurmundsson, formaður Landssamtaka lífeyrissjóða, sagðist við undirritunina ánægður með aðkomu sjóðanna að verkefninu. Þeir hefðu sannfærst um að dýrara væri fyrir samfélagið að gera ekki neitt og þess í stað yrði ráðist í framkvæmdir við nýjan spítala. Gæta þyrfti hins vegar að því að ávöxtunarkrafa sjóðanna yrði uppfyllt. Í því ljósi nefndi Arnar aðkomu sjóðanna að Hvalfjarðargöngunum, en þau væru ein besta fjárfesting lífeyrissjóðanna fyrr og síðar. Lífeyrissjóðirnir væru fullsæmdir af því að fjárfesta líka í heilbrigðisskapandi starfsemi.

Álfheiður Ingadóttir heilbrigðis­ráðherra sagði samkomulagið táknræna yfirlýsingu um að Íslendingar ætluðu sér að eiga áfram heilbrigðiskerfi í fremstu röð. Hún lýsti sérstakri ánægju með aðkomu lífeyrissjóða á landsbyggðinni; hún sýndi að spítalinn yrði þjóðareign. Lífeyrissjóðirnir sýndu framsýni og samfélagslegan skilning.

Heilbrigðisráðherra lýsti því yfir að hún hefði skipað verkefnastjórn yfir framkvæmdina. Gunnar Svavarsson, fyrrverandi alþingismaður, verður formaður stjórnarinnar.

Steingrímur J. Sigfússon fjármálaráðherra sagði framkvæmdina koma á réttum tíma, nú væri lag að skapa störf.

kolbeinn@frettabladid.is