Gera áætlun fyrir nauðstadda

Ferðamálastofa vinnur nú að aðgerðaráætlun um hvernig skuli brugðist við þegar ferðaskrifstofur fara í þrot, svo farþegar erlendis geti verið þess fullvissir að þeir komist heim að nýju, segir Ólöf Ýrr Atladóttir ferðamálastjóri.

„Við gerum okkur grein fyrir því, vegna þessa ástands sem er í þjóðfélaginu, að þessi fyrirtæki, eins og önnur, geta lent í vandræðum," segir Ólöf. Hún minnir á að nú þegar sé ákveðin neytendavernd tryggð með lögum. Hennar stofnun komi ekki að eigendaskiptunum.

Iceland Express hefur skrifað undir viljayfirlýsingu um að kaupa rekstur Ferðaskrifstofu Íslands, segir Matthías Imsland, forstjóri Iceland Express.

Hann nefnir mikil samlegðaráhrif sem ástæðu fyrir þessu, svo og mikinn samdrátt á markaði. Úr verði sterkt félag sem geti veitt öðrum harða samkeppni.

Ferðaskrifstofan, sem rekur Úrval-Útsýn, Plúsferðir og Sumarferðir, þurfti að fresta flugi til Kanaríeyja í gær vegna greiðsluerfiðleika.

Landsbankinn er lánardrottinn ferðaskrifstofunnar en mun ekki hafa komið beint að viðræðunum. Heimildir herma að samningurinn snúist ekki um niðurfellingu skulda.

Þorsteinn Guðjónsson, forstjóri fyrirtækisins, segist bundinn þagnareiði þar til samningurinn verði staðfestur eftir helgi.